• 1.1 Neqerooruteqartitsisarneq naatsumik oqaluttuaralugu

    Neqerooruteqartitsisarneq pillugu pilersuisunut namminersortunut una naatsumik saqqummiussineruvoq, neqerooruteqartitsisarneq qanoq ingerlasarnersoq pisortanillu neqerooruteqartitsinermi suut ilisarnaataanersut aamma ilanngullugit.

  • 1.2 Pisortat pisiniartutut

    Suliffeqarfinnut namminersortunut sungiusimasamiit allaanerusinnaavoq pisortatut oqartussaasumik imaluunniit pisortat suliffeqarfiutaannik niueqateqarnissaq, suliassanik ingerlatsigaangamik imaluunniit suliffeqarfinnut namminersortunik pigineqartunik allanik pilersuisuugaangamik. Pisortanimi ingerlatsisut malittarisassanik arlalinnik malinneqartariaqartunik atuisariaqartaramik, naligiimmik pineqartarneq, ammasuuneq aamma aalajangiisoqarnissani taamaallaat suliatigut tunngavilersuutitut piumasaqaatit ilanngunneqartarnissaat qularnaarniarlugit. Malittarisassanut pissutaavoq pisortat inuiaqatigiit tamaasa sinnerlugit ingerlatsisussaammata taamaasillunilu pisortanit ingerlatsisunik qulakkeerneqartussaalluni qanoq iliorlutik akileraartartut aningaasaataannit annertunerpaamik pissarsisinnaaneq, uppernarsartartussaallugulu qanoq iliorlutik aalajangiisinnaasimallutik. Peqatigitillugu malittarisassanit qulakkeerneqartarpoq naapertuilluartumik unammillertoqarnera - ingerlatseqatigiiffinnut namminersortunut tamanut aamma Kalaallit Nunaanni inuiaqatigiit ineriartornerannut iluaqutaasumik.

  • 1.3 Neqeroortitsineq suugami?

    Neqeroortitsineq atorneqarsinnaavoq, pisortanit ingerlatsisunit namminneq suliarisinnaanngisaminnik suliarerusunngisaminnilluunniit suliassamik suliarinninnissaq kissaatigineqaraangat. Assersuutigalugu pisortat aningaasaataat atorlugit paaqqinnittarfiliornerusinnaavoq, kisianni aamma paaqqinnittarfimmik ingerlatsinivik imaluunniit paaqqinnittarfimmut pequtinik pilersuineq pineqarsinnaavoq.

    Neqeroortitsineq aallartittarpoq, pisortanit ingerlatsisup pisiniarnermini pilersaarutiminik tamanut saqqummiussigaangat. Namminersorlutik Oqartussanut tamanut saqqummiussineq nalinginnaasumik pisarpoq, immikkoortortaqarfiup neqeroortitsiniartup neqeroortitsinermi nalunaarummik immersuigaangat taannalu nittartakkami iserfissiakkut saqqummiullugu. Namminersorlutik Oqartussanit sapinngisamik siunissami neqeroortitsinissamik pilersaarutit neqeroortitsissamaarnikkut erfalasulerlugit erseqqissaatiginiarneqartarput. Namminersorlutik Oqartussat neqeroorutaat soqutigigukku, mail-it allattorsimaffiannut erfalasulimmut nalunaarsinnaavutit  neqeroorutit nutaat pillugit paasissutissarsinissamut nalunaarneq, taava allakkiamik nassiussiffigineqartassaatit neqeroorummik nutaamik ilinnut attuumassuteqarsinnaasumik takkuttoqaraangat.

    Neqeroortarneq pillugu nalunaarutip imarai neqeroorummut sinaakkuttat kiisalu paasissutissatut tamakkiisut ingerlatseqatigiiffiit soqutiginnittut neqeroortitsinermik sulinermi ingerlatseqqinnissaminni atugassaat. Neqeroortarneq pillugu nalunaarutikkut allaaserineqarsimassaaq neqerooruteqarnissamik atortussat sumi nassaarineqarsinnaanersut pissarsiariniarneqarsinnaanersulluunniit.

    Neqerooruteqarnermi atortut tamatigut imarissavaat tunngaviusumik suliaq pillugu paasissutissat soorlu piumasaqaatinik ersarissaanerit, neqerooruteqartitsinermi piumasaqaatit, naleqquttuunermut piumasaqaat aamma nalunaarnissami piumasaqaatit. Neqerooruteqartitsinermi atortut sinneri qanoq isikkoqarnersut neqerooriaatsip ilusaanik neqeroorutillu qanoq ittuunerani aalajangerneqarsimasarput. Pingaartorujussuuvoq, illit neqerooruteqartutut peqqissaartumik neqerooruteqartitsinermi atortut ilaannut ataasiakkaanut paasinnilluarsimanissat.

  • 1.4 Piumasaqaatinik ersarissaanerit:

    Neqeroortitsinermi atortut immikkoortortaanni tassani allaaserineqarput qanoq ittunik suliassamik suliarinninnissamut piumasaqaateqartoqarnersoq. Tamakku pitsaassutsimut, avatangiisit illersorneqarnerani nalunaaqutsiinerusinnaapput, aserfallatsaaliineq pilersuinerluunniit il.il. pillugit piumasaqaatit taakkunatigullu naatsorsuutigineqarpoq neqeroorut piumasaqaatinik allanneqarsimasunik tamanik eqquutsitsisuusoq. Neqeroortitsisup piumasarippagu, tunisassat pilersuutigineqartut nukissiornikkut aalajangersimasumik killiffimmut nalunaaqutserneqarsimassasut, taava iluaqutaanavianngilaq tunisassiamik ajornerusumik nalunaaqutsikkamik neqerooruteqarnissaq, naak taamaasiornikkut akia akikinninngoraluartoq.

    Naallu neqeroortitsinermi atortussatigut piumasaqaatit naammaginartinngikkaluarlugit, isumassarsiatsialaanngilaq neqeroorummut piumasaqaatinik neqeroortitsinermi atortutut allanneqarsimasuniit allaanerusunik piumasaqaasersornissaq, tamakkumi nangaassutitut isigineqarsinnaammata imatut kinguneqartumik tassalu neqeroorut tamakkiisumik itigartinneqarsinnaalluni. Qularutigigaanni atugassarititaasoq piumasaqaalluunniit qanoq paasineqassasoq, taava neqeroortitsisumut apeqquteqarnissamut periarfissaqarpoq tamatumalu kingorna apeqqutit akissutillu neqerooruteqartunut allanut tamanut agguaassinnaallugit.

  • 1.5 Neqerooruteqartitsinermi piumasaqaatit:

    Neqerooruteqartitsinermi piumasaqaatini allassimapput neqeroorummut aalajangersimasunik piumasaqaatit. Namminersorlutik Oqartussanut neqeroortitseriaaseq atorneqarnerpaasartoq tassaavoq pisortatigoortumik neqeroorut, tassani kikkut tamarmik neqerooruteqartitsineri atortussanik pissarsisinnaallutik kikkullu tamarmik neqerooruteqarsinnaasarlutik. Taamaattorli neqeroorut killilik aamma neqeroorut isumaqatiginninniutigineqartussaq naammattoorneqarsinnaapput, pisut ataasiakkaat tamanna piumasaqaatigigaangassuk.

  • 1.6 Naleqquttuunissamut piumasaqaat:

    Immikkut pingaaruteqarpoq maluginiassallugit toqqaaniarnermi piumasaqaatit tamaasa, taakkunani qulakkeerniarlugit neqeroortitsisumiit uppernarsaanissamut piumasaqaatigineqartartut arlallit, neqerooruteqartoq suliassamik neqeroorutigineqartumik naammassinnissinnaanerminut pisariaqartinneqartut piginerai. Uppernarsaasarnissamut piumasaqaatit nalinginnaasumik naammassinnissinnaanissamut neriorsuilluni nalunaarutaasinnaavoq, sillimmasersimanissamut uppernarsaat, suliffeqarfimmut qitiusumik paasissutissanut arlalinnut uppernarsaat, kiisalu suliassamut aalajangersimanerusumik uppernarsaanissamut piumasaqaatit, soorlu assersuutigalugu maskiinaateqarnissamut, innersuussisarnissami allattorsimaffiuteqarnissamut imaluunniit inunnut pingaarutilinnut CV-qarnissamik uppernarsaatit. Pingaartuuvoq uppernarsaatit neqeroortitsinermi atortussani allaaserineqarsimasutut tunniunneqarnissaat, taamaasilluni assersuutigalugu naatsorsuutit arlaannik amigaateqannginnissaat, imaluunniit naammassinnissinnaanissamut neriorsuilluni nalunaarut atsiorneqarsimanngitsoq.

  • 1.7 Pissarsiaqarnissamut piumasaqaatit:

    Pissarsiaqarnissamut piumasaqaatit neqerooruteqartumut qitiulluinnarput. Pissarsiaqarsinnaanissamut piumasaqaatiniuna takuneqarsinnaasoq, qanoq iliorluni neqeroortitsisuusup unammilernermi ajugaasoq nassaarisarneraa. Namminersorlutik Oqartussanit pissarsiaqarsinnaanissamut piumasaqaatit pingaarnerpaat marluk atorneqartarput: aki akikinnerpaaq aamma akip pitsaassutsillu akornanni pitsaanerpaamik pissuseqartoqarnissaa.

    Akikinnerpaamik akimi pitsaassutsip annikinnerpaaffeqarnissaanut piumasaqaatit arlallit allattorneqarsimasarput, suliffeqarfillu annikinnerpaamik piumasaqaatinik akikinnerpaamik akeqartitsilluni naammassinnissinnaasoq suliassap suliarineqarnissaanut ajugaasuusarluni.

    Akip pitsaassutsillu akornanni pitsaanerpaamik pissuseqartoqarnissaa suli aalajangiisuusarpoq pingaarutilik, kisiannili neqeroorut akisunerusoq isiginiarneqalersinnaavoq, assersuutigalugu neqeroorutigineqartup pitsaassusia, kiffartuussinikkut naammassinnissinnaassusia, pilersuinikkut piumasaqaatit imaluunniit immikkoortitikkat siamasissuunerat naammaginartinneqartumik pitsaaneruppata. Neqeroortitsinermik atortutigut erseqqissumik takuneqarsinnaassaaq naliliinermut piumasaqaatit pingaannginnerusut sorliit ilaanersut, aamma qanoq iliorluni piumasaqaatit pingaannginnerusut akornanni oqimaalutaasoqartarnersoq.

    Ilanngullugu pingaaruteqarpoq maluginiassallugu neqeroorut pituttuisuummat, aammalu neqeroorut isumaqatigiissutip ilagilissammagu, kukkusumik naatsorsuisimaguit imaluunniit piginnaasat pitsaassuserlu ingasaanneqarsimappata, taamaasillutik pituttorneqarlutik neqeroorummi allaaserineqarsimasutut akit pitsaaserlu atorlugit pilersuisuunissamut. Taamaattumik neqeroorut tamakkerlugu tamatigut atuarluartaruk kukkuneqarsimanersoq paasiniarlugu, piffissaliussaq eqqarsaatigiuk aamma akunnerit immikkoortinneqarsimasut amerlassusiat piviusorsiortuunersoq aammalu eqqarsaatigiuk suliffeqarfiutivit neqeroorummi neriorsuutigineqarsimasut tamaasa naammassisinnaanerai.